LAOAG CITY – Inpasigurado ti Department of Human Settlements and Urban Development (DHSUD) a tumulong da kadagiti pamilya a napukawan iti pagtaengan gapu ti iduduprak ti Super Typhoon Julian.
Iti babaen ti Department of Human Settlements and Urban Development Integrated Disaster Shelter Assistance Program (IDSAP), maipaay ti unconditional cash assistance kadagiti apektado a pamilia.
Segun kenni Department of Human Settlements and Urban Development Undersecretary for Disaster Response Randy Escolango, tunggal pamilya nga addaan iti totally damaged house ket makaawat iti Php 30,000, idinto a dagiti pamilya a saan met a totally damaged ti pagtaengan da ket makaawat da iti tig-Php10,000.
Kinuna ti opisyal a ti pannakaipaay ti shelter assistance ket umuna a maipaulog iti validation sakbay ti actual payout.
Maibasar iti report ti Department of Social Welfare and Development Disaster Relief Operation, Monitoring and Information Center, agdagup iti 1,846 dagiti nadadael a pagtaengan gapu iti iduduprak ti bagyo Julian ken 1,584 kadagitoy ket taga-Batanes.
