LAOAG CITY – Nagballaag ti Department of Justice (DOJ) kadagiti gangannaet nga agtultuloy nga agtrabtrabaho iti Philippine Offshore Gaming Operations (POGO) companies a sumukon kadagiti otoridad no saan da a kayat ti maikabil iti listaan dagiti blacklisted ti Bureau of Immigration (BI).
Basar iti datos ti Bureau of Immigration, adda pay ti saan a nababbaba ngem 11,000 dagiti chinese nationals nga agtultuloy a birbiruken dagiti otoridad gapu iti saan da a panagparang iti nagbalin a deadline ti ahensya a rumbeng koma nga ipapanaw da ditoy pagilian idi Disyembre 31 ti napalabas a tawen.
Karaman dagitoy kadagiti binallaagan ti Department of Justice gapu iti pannakapaay da a mangi-downgrade kadagiti visa da ken nagtalinaed da paylaeng iti pagilyan kalpasan a nag-expire dagiti iggem da a visa.
Segun ken ni Justice Secretary Jesus Crispin Remulla, dagitoy nga addang ti Department of Justice ket paset ti nagbalin a rakurak ni Presidente Ferdinand Marcos Jr. a ‘total ban’ dagiti operasyon ti Philippine Offshore Gaming Operations iti pagilian.
Kabayatanna, agtultuloy ti manhunt operations ti Bureau if Immigration kadagitoy nga iti agdama ket ikonkonsideraren ti Department of Justice kas ‘illegal aliens’.
