LAOAG CITY – Nagballaag ti Department of Justice mainaig kadagiti possible a maipataw a pannusa kadagi pulis a mapaneknekan a makitintinnulong iti International Criminal Court.
Daytoy ket adda paylaeng ti pannakainaig na iti nagbalin a rakurak iti kallabes ni dati a Senador Antonio Trillanes IV mainaig kadagiti maipagarop a dati ken aktibo a pulis a makikokoordinar iti agdama iti International Criminal Court seknan iti iyus-uswat na nga imbestigasyon kontra iti dati nga administrasyon Duterte.
Segun kenni Department of Justice Spokesperson, Assistant Sec. Jose Dominic Clavano IV, possible a sumango ti maiyannatop nga Administrative charges ken maikkat iti serbisyo ti siasinno man a apulis nga adda ti pannakainaig na iti nasao nga isyu.
Immunan nga inbilin ni Presidente Ferdinand Marcos Jr. a saan a makikoordinar iti International Criminal Court ken ti siasinno man a manglabsing iti daytoy ket maikonsiderar a guilty iti gross neglect of duty o disobedience to authority police officer and government officials.
Maipalagip nga immunan nga inrakurak ni Trillanes nga adda ti nasurok nga aktibo ken dati a miembro ti Philippine National Police ti nakikoordinar iti International Criminal Court mainaig iti maipagarop a nagbalin a papel da iti brutal ken saan a makatao a war on drugs campaign ni dati a Presidente Rodrigo Duterte.
Nupay kasta, inbatad ni Philippine National Police Public Information Office chief PCol. Jean Fajardo nga iti agdama ket awan pay ti naawat da nga impormasyon mainaig iti daytoy ken saan da nga ammo no ania ken sinno ti source ni Trillanes.
