LAOAG CITY – Inpasigurado ti Department of Migrant Workers (DMW) ti naan-anay a tulong para iti pamilya ti Pinoy worker a nabitay idiay Saudi Arabia.
Iti maysa nga interview, inbatad ni Department of Migrant Workers Secretary Hans Leo Cacdac nga amin a tulong a kasapulan ti pamilya ket ipaay ti gobierno.
Segun ken ni Cacdac, bimmisita metten ti Department of Migrant Workers iti pamilya ti saanen a nainaganan a Pilipino ken inpakaammo da ti napasamak iti kapamilya da.
Iti ibibisita ti Department of Migrant Workers, kuna ni Cacdac a dagus da a nangipaay ti suporta iti pamilya ken inammo da ti kasapulan dagitoy.
Immunan a kinumpirmaran ni Department of Foreign Affairs Undersecretary Eduardo De Vega ti pannakabitay ti maysa a Pinoy worker a sumangsango ti kaso a murder idiay Saudi Arabia.
Inpetteng ti Department of Foreign Affairs nga inaramid amin ti gobierno ti kabaelan na, karaman dagiti legal remedy tapno malapdan ti dusa a patay kontra iti pinoy worker ngem nadagsen ti ebidensya a naipresentar kontra kenkuana.
