Inulit nga inpaganetget ti Department of National Defense (DND) a saanda pay a nakitulag iti nagbaetan ti China maipapan iti Ayungin shoal sipud idi nagtugaw ni Presidente Ferdinand “Bongbong” Marcos Jr. idi Hunio 30, 2022.
Segun ken ni Department of National Defense Secretary Gilbert Teodoro, awan pay ti nakasaritada nga opisial ti gobierno ti China makatawen ti napalabas.
Innayon ni Teodoro, a propaganda laeng dagiti Tsino dagitoy palso nga impormasyon.
Inbatadna a panggepna nga iyadayo ti atension dagiti Pilipino iti pudpudno a kasasaad ken ti mapaspasamak iti West Philippine Sea (WPS).
Inpaganetget ti sekretario a pulos a saan a sumrek ti Department of National Defense iti katulagan a mangikompromiso kadagiti soberano a karbengantayo iti sidong ti United Nations Convention on the Law of the Sea nga inadaptar ti 2016 Arbitral Ruling.
Maipalagip a ti napalabas nga administrasion ni Duterte ket simrek iti Gentlemen’s Agreement iti China no sadino a baybay-an ti Pilipinas ti West Philipine Sea, partikular ti Ayungin Shoal, nga inlibak ti gobierno.
