LAOAG CITY – Target ti Department of Social Welfare and Development a palawaen ti “Walang Gutom Kitchen” food bank initiative kadagiti sumagmamano a probinsia ditoy pagilian.
Iti press conference a naangay idi kalman, inpakaaammu ni Department of Social Welfare and Development ti USec. Edu Punay a planoda ti mangipasdek iti ad-adu pay a food bank sites kadagiti lugar nga addaan ti nangato kaso ti malnutrision ken kinapanglaw.
Karaman kadagiti probinsia a kitkitaen ti ahensya ket ti Leyte ken Samar iti Visayas ken Bicol region iti Luzon.
Karaman pay ti Bangsamoro Autonomous Region in Muslim Mindanao (BARMM) a naibilang nga addaan iti kangatuan a kaso ti malnutrision.
Maipalagip a ti nasao a programa ket immun-una a nairugi iti Metro Manila idi Disiembre 2024.
Ti Walang Gutom Program ket maysa a gannuat ti gobierno ken ti pribado a sektor a panggepna a tamingen ti malnutrision ken food poverty.
