LAOAG CITY – Inbilin manen ni Department of the Interior and Local Government Sec. Benjamin Abalos Jr. kadagiti lokal a gobierno iti ad-adda pay a panangpaiget da iti implementasyon kadagiti firecrackers ordinances iti bukod da a lugar.
Daytoy ket iti baet ti agtultuloy a panagngato dagiti kaso ti firecrackers-related incident iti pagilyan, sumagmamano nga aldaw sakbay a sarabwen ti baro a tawen.
Basar iti inparuk-at a datos ti Department of the Interior and Local Government, umaboten iti 1,210 a Local Government Units ti nangisumitir ti bukod da nga ordinansa mainaig iti pannakaipawil ti panagusar kadagiti paputok iti masakupan da a lugar.
Inpalagip manen ni Sec. Abalos kadagiti amin a lokal a gobierno nga idaulwan ti panangsigurado a maiyadayo iti desgrasya babaen ti paputok dagiti kailian da ita nga Holiday Season babaen iti panangipatungpal a naimbag dagiti ordinansa nga insumitir da.
Maipalagip a basar iti inparuk-at a listaan ti Philippine National Police ket karaman kadagiti maipawil a paputok ket ti Five Star, Pla-Pla, Piccolo, Goodbye Philippines, Goodbye Bading, Goodbye Hamas, Giand Bawang, Watusi, Atomic Triangle, Sinturon ni Hudas, Super Yolanda, Super Lolo, ken Coke-in-Can.
Kabayatanna, malaksid iti daytoy ket inrakurak pay ti Philippine National Police a naiget pay ti iyus-uswat da a cyber-patrolling para iti gagem a naan-anay a maparmek dagiti ilegal online sellers dagiti maipawil a paputok iti pagilyan.
