LAOAG CITY – Target ti Department of Transportation ti mangipaay ti insentibo kadagiti agtagikua ti barko nga aginvest iti panaggatang kadagiti baro a barko tapno i-upgrade ti agdama a passenger ken cargo vessels nga agop- operar iti pagilian.
Inrakurak daytoy ni Transportation Sec. Jaime Bautista iti sidelines ti 50th anniversary celebration ti Maritime Industry Authority (MARINA).
Inlawlawag ni Bautista a gagem da a maaddaan ti pagilian ti baro a barko gapu ta napinpintas ti operasyon na ken benepisyo daytoy para kadagiti pasahero ken ti riding public.
Gapu iti daytoy, kuna ni Bautista a gututiguten da dagiti agtagikua ti barko nga agpuunan isut gapuna nga importante met para iti gobierno nga irebisar ti insentibo para kadagiti paseknan.
Iti baet daytoy, inpalgak ni Bautista a kasapulan nga umuna a pagbalinen daytoy a linteg isut gapuna a makitintinnulong ti Department of Transportation iti Kongreso.
Inpakaammo met ni Sonia Malaluan, Maritime Industry Authority administrator nga ad-adalen da pay no kasanu a mairaman iti pagalagadan ti Requirement ti climate change reduction.
Iti agdama ket palpalubusan paylaeng ti ahensya dagiti barko a nasuruken a 20 a tawen idinto a pinagtalinaed da ti 20-year ceiling para kadagiti addaan ti as-asideg a rota.
Maipalagip nga idi Enero ita a tawen ket inbilin no Presidente Ferdinand Marcos Jr. iti Maritime Industry Authority nga i-modernize ken i-standardize ti sistema na tapno makasabay iti international standards.
