LAOAG CITY – Masapol a mang-hire ti Department of Education (DepEd) ti 48,000 school counselor associates iti intero a pagilian.
Daytoy ket gapu ta iti agdama a budget ita a tawen ket 10,000 a posisyon laeng ti sakupen na.
Inbatad ni Education Secretary Sonny Angara a ti gagem daytoy ket maadaan ti maysa nga school counselor associate iti kada pagadalan tapno papigsaen ti mental health ken psychosocial support para kadagiti agad-adal.
Ti panag-hire ti nayun nga school counselor associates ket karaman kadagiti addang ti Department of Education iti panangilungalong ti serye ti school violence incidents, karaman ti napasamak a shooting incident iti Ateneo de Zamboanga University a nagresulta ti pannakatay ti dua nga estudyante a pakairamanan ti maipagarop a shooter ken maysa pay nga estudyante ti nasugatan.
Para iti 2026, ti Department of Education ket addaan ti ₱1.015-trillion budget, basar iti budget breakdown ti departamento.
Iti nasao a kantidad, ₱705.79 bilyon ti nakailatang para iti suweldo ken benepisyo dagiti mangisursuro ken non-teaching personnel.
Karaman iti alokasyon ti ₱471.06 bilyon para iti permanent positions, ₱1.74 bilyon para iti teaching overload honoraria, ₱4.82 bilyon para kadagiti mangisursuro nga adda it narigat wenno remote assignments, ken ti ₱53.94 bilyon para iti retirement ken life insurance premiums.
Kuna ni Angara a mangnamnama ti Department of Education a maka-secure ti nayun a pondo iti 2027 tapno in-inot a mapunwan ti nabatbati nga school counsellor positions.
Innayon ni Angara a ti panagkurkurang ti professional guidance counselors ket apagapaman laeng gapu iti minimum requirement para iti master’s degree, limitado iti kuwalipikado nga aplikante.
