LAOAG CITY – Inpakaammo ni Atty. Donato Balderas Jr., ti Schools Division Superintendent iti Department of Education – Schools Division Office ditoy Ilocos Norte nga agsagsaganadan para iti pannakaisubli ti dati a panaglukat ken panagngudo ti klase para iti School Year 2025-2026.
Inbatad ni Atty. Balderas nga iti agdama ket manarimaan ti “adjustment” para iti pannakaisublin ti dati nga school calendar.
Inlawlawagna nga inton masungad nga School Year 2024-2025 ket aglukat pay laeng ti klase inton bulan ti Hulio.
Maipalagip nga adu kadagiti mangisursuro ken agad-adal ti nagkiddaw nga isubli ti gobierno ti dati nga school calendar tapno maliklikan a mapasaranda ti kinabara ti panawen kabayatan ti panagklase dagitoy.
Immuna iti daytoy, pinirmaan ni Presidente Ferdinand Bongbong Marcos Jr. ti maysa a linteg a mangibagbaga iti pannakaisubli ti nakadawyan a panagserrek dagiti estudiante ken mangisursuro iti pagadalan.
