LAOAG CITY – Linawlawagan ni Mrs. Cherry Joy Discaya-Garma, Information Officer ti DepEd Ilocos Norte nga awan ti inparuk-at ti departamento a pammilin a dagiti sumrek kas maestra wenno maestro ket masapol nga agpabakuna nga ummuna.
Daytoy ket kalpasan nga adda ti naawat na a report nga agpabakuna nga ummuna dagiti maseknan sakbay da a makastrek iti DepEd.
Mainaig iti daytoy, kunana a kas pammilin ket saan nga inkapilitan ti panagbakuna kontra iti covid-19 ngem gutgutiguten na dagiti teaching ken non-teaching staff nga agpabakuna para iti proteksyon.
Inbatad na nga iti biang ti DepEd-Ilocos Norte, nasurok uppat a ribo a personnel ti manamnama nga agpabakuna kontra iti covid-19.
Kunana nga iti medical personnel ti DepEd ket addan ti 40 a nabakunaan pakairamanan dagiti school nurses idinto nga iti teaching ken non-teaching personnel ket natudukan ti covid-19 vaccine dagiti 207 kas iti senior citizens ken dagiti addaan ti comorbidities.
Inlawlawag na a kas paset iti pananggutigot da kadagiti DepEd personnel ket mangiyus-uswat ti medical unit ti orientation no sadinno a ditoy a mailawlawag ti kinapateg ken ti epekto ti panagpabakuna.
