LAOAG CITY – Inlawlawag ni Mrs. Cherry Joy Discaya-Garma ti Information Officer ti DepEd Ilocos Norte a no apay dagiti agad-adal iti elementarya ken sekondaria laeng ti naikkan ti tablets.
Daytoy ket kalpasan nga adda ti naawat a reklamo ti Bombo Radyo Laoag manipod iti maysa a concern citizen a no apay dagiti estudiante ti elementarya ken sekondaria ti nabenepisiaran ti tablets a saan met kanu a dumaldalan dagitoy iti online class nga imbes kanu koma a dagiti agad-adal ti kolehio ti maibunungan ti tablets gapu ta dagitoy dagiti kangrunaan a dumaldalan ti online class.
Segun ken ni Garma, umuna iti amin ket saanda a sakup ti kolehio no di ket sakup ti Commission on Higher Education wenno CHED rason nga awan ti bilegda pakaseknan iti daytoy a banag.
Kunana nga indunar ti Provincial Government of Ilocos Norte dagiti mobile tablets iti DepEd Ilocos Norte gapu ta kasapulan dagiti agad-adal ti tablet nga usarenda a panagadal.
Inbatadna a saan met laeng a pang-online class ti tablet no di ket pakairamanan payen ti pannakai-download kadagiti nagduduma nga educational materials a nayon a tulong iti panagadalda.
Inbagana a babaen kadagiti naited a tablets ket mabalin nga ag-download pay dagiti agad-adal iti educational applications ken agbuya iti YouTube kadagiti educational programs a pakasursuroan dagiti ubbing.
Innayon ti Information Officer ti DepEd Ilocos Norte nga umabot ti 3,890 tablets ti maibunong kadagiti nagduduma nga ili ken Siudad ditoy probinsia ngem saanna met a masinunuo no manon ti naiyawaten gapu ta mannarimaan pay laeng ti pannakaibunong dagitoy.
Mainaig iti daytoy, segun ken ni Mr. Danny Daquioag, ti mangidadaulo ti Provincial Education Office a dagiti tablets manipod iti Gobierno Probinsial ket naituding laeng para iti Basic Education.
