LAOAG CITY – Inlawlawag ni Atty. Donato Balderas Jr., ti Schools Division Superintendent iti Department of Education – Ilocos Norte pakaseknan iti maipagarup nga umad-adu dagiti agad-adal nga agbalbalin nga honor student iti baet a nababa ti rekord ti pagilian iti Programme for International Student Assessment
Segun kenkuana, daytoy ket kalpasan a nabalbaliwan ti inpaulog ti Department of Education a curriculum babaen iti pannakaaprobar ti Republic Act No. 10533.
Inbatadna a ti dati a masursurot a pagannurutan ket ti Department of Education Order No. 8 Series of 2015 wenno ti pannakabalbaliw ti pannakaarisit ti classroom assessment para kadagiti estudiante babaen iti performance task.
Kunana a written ken quarterly examination ti dati a pangal-alaan ti grado dagiti mangisursuro kadagiti estudianteda.
Mainaig iti daytoy, kuna ti Schools Division Superintendent a gagem ti Republic Act No. 10533 a maipaayan ti 21st Century skills dagiti agad-adal banag a masapol ti performance task dagitoy.
Inpakaammona a maibasar iti Department of Education Order No. 36 Series of 2016 ket naikkaten ti nakadawyan a pagalagadan nga adda laeng ti Top 10 wenno Top 15 nga estudiante ti maikkan ti pammadayaw.
Inpalgakna a babaen iti nasao a pammilin ket maikkan ti gundaway nga agpursige dagiti estudiante iti panagbasada gapu ta nakadepende kadakuada ti magun-odda a grado.
Inbagana a dagiti agad-adal a makaala ti General Weighted Average a 90 agingga 94 ket mapadayawan kas With Honors, 95 agingga 97 ket With High Honors idinto a no 98 agingga 100 ket mabigbig kas With Highest Honors
Innayonna nga arig ket kabinnalubal ti bukud a bagi ti maysa nga estudiante ita nga henerasion a basar iti agdama a pagannurutan ti departamento.
Kabayatanna, saan nga umannugot ni Atty. Balderas Jr. ti panangipaay ti money garland kadagiti nagturpos nga estudiante kabayatan ti graduation ceremony gapu ta makasair ti rikna dagiti dadduma nangruna kadagiti awan ti kababalinda iti panagbiag.
