LAOAG CITY – Inpakaammo ni Dr. Joanne Corpuz, schools division superintendent ti DepEd Ilocos Norte a saan kuma a mausar dagiti pagadalan kas isolation facitlity.
Kuna na a daytoy ti takder ni DepEd Sec. Leonor Brones ngem no bilang nga awan ti lugar dagiti pasyente a naka-isolate wenno naka-quarantine iti ospital wenno dadduma a pasilidad ket possible a maaramat dagiti pagadalan ngem masapul a masurot ti lokal a gobyerno dagiti kondisyon ti DepEd.
Para kenni Corpuz, posible a maaddaan met ti risgu dagiti pagadalan no mausar kas isolation room nangruna no saan a masurot dagiti protocol a naipatungpal.
Kabayatanna, inbatad ni Corpuz nga adda met ti pammilin ti Department of Interior and Local Government a saan a mausar dagiti pagadalan kas isolation wenno quarantine facility mainaig ti coronavirus disease 2019.
Nupay kasta, adda met ti memorandum ti DepEd secretary para kadagiti regional directors nga isuda ti mangaksiyon ti anyaman a kiddaw dagiti lokal a gobyerno mainaig ti pannakausar dagiti classroom ti pagadalan kas quarantine wenno isolation facility.
Gapu iti daytoy, kinumpirmaran ni Corpuz nga adda ti uppat a mayor a nagkiddaw kenkuana para ti pannakausar dagiti sumagmamano a classroom.
Innayon ni Corpuz nga awan pay ti kumpirmasyon a naaprobaran dagiti kiddaw dagiti mayor iti ili ti Solsona, Burgos, Pinili ken iti ili Marcos.
Iti mainaig a damag, kinumpirmaran ni Dr. Corpuz, a naamuan na ti impormasyon mainaig iti panagtalinaed ti maysa nga Person Under Monitoring iti Day Care Center iti bisinidad ti Buyon Elementary School iti ili ti Bacarra.
Kuna na a naamuan na daytoy manipud kenni Mr. George Manuel, Division Disaster Risk Management Coordinator idi rabii babaen ti panagsaludsodna iti school head ti nasao a pagadalan.
Segun kenni Corpuz, maipagarup a saan nga inpakada ti kapitan ti barangay iti school head mainaig iti panagtalinaed ti PUM iti nasao a Day Care Center a masarakan iti uneg ti nasao a pagadalan.
Inbatad ni Corpuz a binilin na iti coordinator ken ti medical officer tapno maivalidate, makisarita kadagiti opisyal ti barangay, ken ti pannakasurot dagiti kasapulan mainaig ti pannakaisolate ti maysa a PUM.
Innayon ni Corpuz nga awan ti poder ti DepEd a mangiparit kadagiti maseknan gapu ta kukua da ti Day Care Center ngem masapul a suruten da dagiti requirements gapu ta adda met iti uneg ti Buyon Elementary School a sakop ti DepEd ti nasao a Day Care Center.
