LAOAG CITY – Naliday nga inbatad ni Atty. Donato Balderas Jr., Schools Division Superintendent ti Department of Education – Ilocos Norte a saan a nasayaat ti rikna ti maawagan kas Bullying Capital ti Pilipinas iti intero a lubong.
Segun kenkuana, basar kadagiti report a maaw-awat iti opisinana ket awan met ti maibilang a nakaro a kaso iti bullying kadagiti pagadalan ditoy probinsia gapu ta masolbar met dagitoy.
Inbatadna nga awan ti pangibasaran a datos no bimmaba wenno ngimmato ti kaso ti bullying ditoy probinsia gapu ta maitantandudo ti child friendly school rason nga awan dagiti isyu a saan a masolbar.
Kunana a naiget ti panangtutokda maipapan iti safe and conditioned learning environment, physical and mental wellness dagiti estudiante ken ti pannakikammayet dagiti nagannak ken stakeholders iti pagadalan.
Mainaig iti daytoy, kalikagum ni Atty. Balderas Jr. a nasken a saan nga ipalubos ti pagilian nga agbalin nga umuna ti Pilipinas maipanggep iti panag-bully.
Innayonna a no adda dagiti panag-bully a mapasamak iti uneg ti pagadalan ket adda dagiti umiso a proseso a rumbeng a masurot no sadinno nga adda ti maiwayat nga imbestigasion.
Immuna iti daytoy, nabirngasan kas Bullying Capital ti Pilipinas iti intero a lubong kas maibasar iti Program for International Student Assessment.
