LAOAG CITY – Saan nga umanamong ni Atty. Donato Balderas Jr., Schools Division Superintendent ti Department of Education – Ilocos Norte iti pannakaisubli iti dekorasion iti uneg ti klasrum kadagiti pagadalan ditoy pagilian.
Daytoy ket kalpasan ti inrakurak ni Department of Education Sec. Sonny Angara nga ad-adalenda iti pannakaisubli iti pannakaipalubos iti panangipegket kadagiti visuals ken decoration iti uneg ti klasrum.
Segun ken ni Atty. Balderas, no isuna ti masaludsod ket patienna a napinpintas no saanen a maisubli gapu ta napinpintas iti kita kadagiti klasrum no simple laeng.
Inbatadna a daytoy ket makatulong tapno makapokus a nasayaat dagiti estudiante iti leksion nga isursuro dagiti mangisursuro.
Nupay kasta, kunana a no maipapan met kadagiti nursery ken kindergarten pupils ket nasken a saan a maikkat dagiti visuals a nakaipegket iti uneg ti klasrum tapno magutigot dagiti agad-adal a sumrek nangruna ket nalaka a ma-boring dagiti ubbing ken kas panangsurot iti pagannurutan iti departamento.
Inlawlawagna a no ingkaso man a maadal ti Department of Education ken mapagnunumoanda nga isubli ti dekorasion ket respetarenda daytoy ken sumurotda iti nasao a pagalagadan.
Maipalagip nga immunan nga inbilin ti dati a sekretario ti Department of Education a ni Vice Pres. Sara Duterte babaen iti Deped No. 21 Series 2023 wenno No Decorations Policy idi Agosto 2023 a maipawil iti dekorasion iti uneg ti klasrum tapno maipasigurado a nakatutok dagiti estudiante iti leksion dagiti mangisursuro.
