LAOAG CITY – Nagpalagip ti Department of Education-Ilocos Region maipanggep iti “No Collection Policy” para iti graduation ken moving-up ceremonies.
Segun ken ni Department of Education-Ilocos Region Assistant Regional Director Dr. Rhoda Razon a nasken a tungpalen ti Department of Education Memorandum No. 23 Series of 2024 para iti seremonya a naiyeskedyul iti nagbaetan iti Mayo 29 agingga 31 para iti School Year 2023-2024.
Inbatadna a nasken a simple ngem addaan ti kaipapananna dagiti seremonia ti graduation ken moving up ceremonies.
Inlawlawagna a para iti daytoy a tawen, agarup 101,354 a Grade 12 learners ti manamnama nga agturpos, 101,237 ti Grade 10 learners, 102,572 ti Grade 6 learners ken 83,974 ti Kindergarten learners ti paset ti moving up ceremonies.
Kunana a ti gagem ti pagannurutan ti Department of Education ket tapno saan a madagsenan dagiti nagannak iti kanayonan a gastos ken balakadanna dagiti opisial ti pagadalan nga usarenda ti pundoda iti Maintenance and Other Operating Expenses wenno (MOOE) para iti aniaman a kasapulan a gastos.
Inpalgakna a mabalakadan pay dagiti pagadalan nga iyuswatda ti graduation wenno moving-up rites-da kadagiti indoor venues nga addaan ti umno a bentilasion wenno covered courts iti baet ti nangato a temperatura gapu iti kinabara ti panawen a mapaspasaran iti rehion.
Mainaig iti daytoy, kuna ni Dr. Marjorie Pudin ti Department of Education-Ilocos Region a rumbeng a liklikan dagiti eskuelaan ti panagiskediul bayat ti oras ti aldaw a kangatuan ti temperatura tapno masigurado ti kinatalged ken proteksion dagiti agad-adal, mangisursuro ken dagiti nagatendar.
Inpakaammo ni Pudin nga agarup 281 a learners ken 94 a teaching and non-teaching personnel ditoy rehion ti nakapadas iti heat cramps, 2,711 a learners ken 1,088 a teaching and non-teaching personnel ti nakapadas ti heat exhaustion ken 1,678 a learners ken 297 a teaching ken pakairamanan dagiti saan a mangisursuro ket addaan ti skin rashes idi nangrugi ti napudot a paniempo.
Innayonna a nakapadas ti heat stroke ti tallo nga agad-adal ken innem a teaching ken non-teaching personnel iti kallabes ngem dagus met a nagresponde dagiti medical health personnel kadagiti pasiente ken naikkan dagitoy ti umno a medical care a kasapulan tapno saanda a maospital.
