LAOAG CITY – Immapela ti Department of Education kadagiti lokal a gobierno a liklikan nga usaren dagiti pagadalan kas evacuation centers iti panawen ti tudtudo gapu ta mabalin a makaapektar iti panagadal dagiti estudyante.
Segun ken ni Department Education spokesperson Undersecretary Michael Poa, indasar da daytoy a pakaseknan da iti naiyuswat a council meeting karaman ti National Disaster Risk Reduction and Management Council (NDRRMC).
Kabayatanna, basar iti narepaso a Department of Education Order 37 a pinirmaan ni Vice Presidente ken Education Secretary Sara Duterte, mabalin laeng nga usaren dagiti pagadalan kas immediate evacuation site iti panawen dagiti kalamidad ngem saan a rumbeng nga aglabes ti 15 nga aldaw.
Ti klase para iti kindergarten agingga iti Grade 12 ken trabaho iti public schools ket otomatiko a kanselado kadagiti lugar nga adda iti Tropical Cyclone Wind Signals 1,2,3,4,wenno 5.
Kas panagsagsagana met iti mapaspasungadan a La Nina phenomenon, inbatad ti Department of Education official nga itultuloy ti ahensya ti panangipatungpal ti alternative delivery modes no kasapulan a masuspenso ti in person classes.
Malaksid iti daytoy, matartarimaan metten dagiti state-run schools nga adda ti perdisyon na para iti panagsagsagana iti panawen ti tudtudo.
