LAOAG CITY – Inaprubaranen ti Department of Education (DepEd) ti P24,000 a tinawen a subsidiya para kadagiti mangisursuro kadagiti pribado a pagadalan iti pagilian.
Daytoy ket ngimmato ti P6,000 manipod iti agdama a P18,000 a salary subsidy dagiti mangisursuro kadagiti private schools.
Mangrugi ita nga school year 2025-2026, maawat dagiti kwalipikado a mangisursuro ti P24,000 a subsidiya iti babaen ti Teachers’ Salary Subsidy component ti Government Assistance to Students and Teachers in Private Education (GASTPE) program.
Tapno agbalin a kwalipikado a makaawat ti subsidiya, masapol a lisensyado dagiti mangisursuro, full-time ti estado ti employment iti pribado a pagadalan ken kasapulan nga adda ti iggem na nga Educational Service Contracting (ESC) classes iti uneg ti tallo nga oras iti kada lawas.
Ti nasao nga umento iti subsidiya ket karaman kadagiti prayoridad a reporma iti edukasyon a nadakamat ni Presidente Ferdinand Marcos Jr. iti maikapat nga State of the Nation Address na idi Lunes, Hulyo 28.
Segun ken ni Education Secretary Sonny Angara, ti nasao nga addang ket kas panangbigbig iti kontribusyon dagiti mangisursuro iti pribado a pagadalan kas napateg a katulungan iti sektor ti edukasyon.
