LAOAG CITY – Inbalakad ni DepEd Supt. Doctor Joan Corpuz a saanen a kasapulan pay a makialamano ken makibeso kadagiti mangisursuro dagiti estudyante nga agturpos kabayatan ti panangawat da ti diploma da tapno maliklikan ti coronavirus.
Inbatad ni Corpuz nga umanayen nga ikabil ti ima iti batog ti puso ken ag-bow kalpasan a maawat da ti diploma kas paset ti panangipaay da ti respeto kadagiti mangisursuro.
Kuna pay ni Corpuz nga uray dagiti nagannak ket saanen a kasapulan a makialamano da kadagiti mangisursuro.
Inkalintegan na a namnamaen nga ado dagiti nagannak nga aggapo iti ballasiw taaw, karaman dagiti pagilyan nga addaan ti kaso ti coronavirus tapno atendaran da ti panagturpos dagiti annak da.
Kabayatanna, inbalakad pay ni Corpuz a saan a kasapulan a gumatang ti nagarbo nga arwaten nga isuot iti graduation.
