LAOAG CITY – Agkidkiddaw ti Department of Education – Schools Division ditoy siudad ti Laoag ti tulong iti lokal a gobierno para iti pannakaitultuloy ti pannakaipasdek dagiti school buildings iti Science High School iti Brgy. Vira ditoy siudad ti Laoag.
Malaksid iti daytoy, kalikagumda pay a pundoan ti lokal a gobierno dagiti furnitures ken dagiti dadduma pay a kasapulan ti nasao a pagadalan pakairamanan ti sueldo dagiti teaching ken non-teaching personnel iti lima a tawen.
Babaen iti panagpinnirma ti Memorandum of Agreement iti nagbaetan da Mayor Michael Marcos Keon ken Dr. Joann Corpuz ket posible a mapasamak daytoy.
Mainaig iti daytoy, kwinestionaran ni Sangguniang Panlungsod Member Juan Conrado Respicio no apay a saan a ti Kongreso ti mangpundo dagiti kasapulan iti nasao a pagadalan.
Kuna met ni Konsehal John Michael Fariñas, Chairman ti Committee on Education a nagsardeng a mapundoan ti nasao a pagadalan idi kangitingitan ti pandemia idinto idi saan pay a nangrugi ti panagoperar ti pagadalan ket punpundoanen ti Kongreso.
