LAOAG CITY – Inpasigurado ti Department of Education – Schools Division Office ditoy siudad ti Laoag ti kinatalged dagiti deworming tablet a maibunbunong kadagiti estudiante ditoy siudad ti Laoag.
Segun ken ni Ms. Imee Nicolas, Youth Development Officer I ti Department of Education – Schools Division Office ditoy siudad ti Laoag, manarimaan ti panagsagsaganada para iti pannakaisayangkat ti deworming program inton Hulio 29.
Inbatadna a maipatungpal daytoy kadagiti amin a pampubliko a pagadalan ditoy siudad ti Laoag kas naiyataday iti Department of Health – Administrative Order 2006-0028 a mamindua a daras iti kada tawen wenno iti bulan ti Enero ken Hulio a pannakaiyuswat ti nasao a programa.
Inlawlawagna nga aggapu mismo iti Department of Heath dagiti deworming tablet isut gapuna a natalged a tumaren daytoy dagiti agad-adal.
Mainaig iti daytoy, inpakaammo ni Nicolas a kasapulan latta ti parent’s consent dagiti estudiante tapno naan-anay nga adda ti pammalubos dagiti nagannak kadakuada sakbay nga agtumarda ti pagpurga.
Inpettengna a saan nga ingkapilitan ti panagtumar ti pagpurga dagiti estudiante ngem gutgutigotenda dagiti nagannak a palubosan ti annakda a makipaset iti deworming program para iti salun-atda.
Kunana nga umdas ti deworming tablet iti Department of Education – Schools Division Office ditoy siudad ti Laoag.
Innayonna nga awan met pay dagiti report mainaig iti panag-back out dagiti agad-adal iti panagtumar dagiti estudiante iti deworming tablet.
