LAOAG CITY – Nailawlawag ditoy Bombo Radyo Laoag ti reklamo mainaig iti maipagarop a saan a napintas a connectivity ti VSAT a nainstular iti Calayab Elementary School; Balacad Elementary School ken Bacsil Elementary School.
Inbaga ni Engr. Almaddin Domingo, Information Technology Officer ti Schools Division ditoy ciudad nga adda ti binolan a report dagiti nasao a pagadalan mainaig iti inaldaw nga speed test connectivity ti VSAT.
Kuna na nga idi un-unana ket napintas ti serbisyo ti VSAT agingga nga idi Hunyo ita a tawen ket inpakaammo kadakuada ti supplier a saan nga agloload ti pasilidad da.
Inkalintegan ni Damingo nga uray ania ti ar-aramiden da ket saan da latta a maperfect ti connectivity na a kas kadagiti dadduma a provider.
Rumrumuar a ti pondo para iti nasao a programa ket umabot iti maysa a milyon a pisos no sadinno a ti baybayadan ti DepEd-Laoag City ket 25 ribo a pisos.
Inpalgak met ni Mrs. Vilma Eda, ti Schools Division Supt. ditoy ciudad a saan a makuna a maminpinsan nga agpalpalyar ti connection no agtudo gapu ta adda met dagiti gundaway a nangato latta.
Kabayatanna, rumrumuar pay a ti 1-milyon a pisos a pondo ti nasao a proyekto ti DepEd ditoy ciudad ket naukkon manipod iti fun raising nga iyuswat ti nasao a departamento ken nagduduma nga stake holders.
Nupay kasta, inpasingked ni Melissa Felipe, Education Program Soecialist for Partnership a sakbay nga inyuswat da ti nasao a fund raising ken nagsolicit da iti naduma-duma nga stakeholders ket nangala da pay laeng nga immuna ti permit manipod ditoy ciudad.
Inpasingked ni Eda nga iti agdama ket tututukanen ti legal team da da daytoy nga isyu.
