LAOAG CITY – Inpakaamo ni Ms. Imee Nicolas, Project Development Officer 1 Youth Formation ti Department of Education (DepEd) Laoag nga adda ti naawatda a report mainaig ti panaglilinnuko dagiti estudiante kadagiti pagadalan ditoy siudad ti Laoag.
Kunana a dagitoy ket saan a maibilang a seryoso a kaso ti bullying gapu ta dagitoy ket insigida ti pannakaresolbarna.
Inlawlawagna a mangipaayda nga insigida ti counseling kadagiti estudiante a karaman dagiti nagannak no kasapulan ket paayabanda pay dagitoy.
Kunana nga uray awan ti maaaw-atada a nakaro a kaso ti bullying ket naiget ti panagwanwanda tapno masigurado a maliklikan ti kastoy a pasamak.
Inbatadna a malaksid kadagiti Guidance Counsellor ket adda pay nagduduma nga agbantay.
Innayonna pay a no adda ti maipadanon a report ket insigida a mangiwayatda ti standard procedure tapno masolbar nga insigida ket saanen a kumaro.
