LAOAG CITY – Target ti Department of Education ti manglukat iti nasurok nga 65,000 a baro a teaching ken non-teaching position kadagiti pampubliko a pagadalan ita a tawen.
Segun ken ni Education Secretary Sonny Angara, dytoy ket gapu iti nailatang a ₱15.4 bilyon a pondo para iti pannakaparnuay ti 65,184 a baro a posisyon para kadagiti mangisursuro.
Ti dakkel nga alokasyon ket gagem na a masolbar ti agtultuloy a panagkurkurang dagiti mangisursuro ken dagiti empleado iti sektor ti edukasyon.
Partikular a solbaren daytoy dagiti kasapulan kadagiti lugar no sadinno nga agdudupudop wenno ado unay dagiti estudyante iti kada classroom.
Malaksid iti daytoy, gagem pay a mapasayaat ti serbisyo iti edukasyon kadagiti lugar a nakurang kadagiti kastoy a klase ti programa ken suporta.
Innayon ti sekretaryo nga adda ti umdas a bilang dagiti indibidwal a nakapasa iti Licensure Examination for Teachers (LET), tapno punwan dagiti amin a baro a posisyon a malukatan kadagiti pampubliko a pagadalan.
