LAOAG CITY –Nagballaag ti Department of Education (DepEd) a saan laeng a social media ti rumbeng a kitaen iti pannakalapped ti kinaranggas kadagiti pagadalan. Mabalin met nga apektaran dagiti ubbing ti naranggas a linaon manipud iti dadduma a pagilian, YouTube, ken uray dagiti regular a programa iti telebision.
Kabayatan ti Senate hearing iti pannakapaltog dagiti pagadalan idiay Tacloban ken Zamboanga City, kinuna ni DepEd Undersecretary Malcolm Garma nga alisto a dumanon kadagiti estudiante a Pilipino dagiti insidente ti kinaranggas iti ballasiw-taaw gapu iti digital platforms.
Dinakamatna ti maysa a shooting incident idiay Thailand a nag-viral sakbay ti insidente idiay Ateneo de Zamboanga University. Nupay kasta, inlawlawagna a saan a maibaga ti DepEd no nakaimpluensia iti pannakapaltog ti Zamboanga.
Segun ken ni Garma, nakaawat met ti DepEd iti feedback a mabalin a nakaimpluensia ti sumagmamano a linaon ti YouTube iti immun-una a kaso iti Tacloban.
Ngem kinunana a saan koma a limitado iti internet ti panaganalisar. Uray kadagiti lugar a limitado ti internet access, mabalin a makasabat dagiti ubbing kadagiti naranggas a tema iti telebision.
Kinunana nga adu a regular a programa ti drama ti addaan kadagiti tema a pungtot, gura, panagibales ken panagusar iti paltog, a mabalin met nga impluensiaan dagiti ubbing.
Agtultuloy ti panangpapigsa ti DepEd kadagiti school threat assessments, psychosocial interventions ken emergency preparedness tapno malappedan ti ad-adu pay a kinaranggas kadagiti pagadalan, bayat a maliklikan ti panangpagbalin kadagiti heavily fortified areas a kampus.
