LAOAG CITY – Plano ti Department of Education a rentaan dagiti pribado a pagadalan a napaserraanen ken dadduma pay a pribado a sanikua tapno masolbar ti kinakurang iti classroom ditoy pagilian.
Inbatad ni Department of Education Secretary Sonny Angara, iti naisayangkat a Classroom Market Scoping Activity, kabinnulig ti Student First Coalition ken ti pannakitinnulong dagiti real estate developers, government agencies ken property management groups.
Nadakamat a maysa kadagiti target ti Department of Education a rentaan ket ti maysa a pribado a pagadalan idiay Laguna a nagserra idi pay 2020.
Ti nasao a pagadalan ket addaan ti pito a classroom, kapiterya, opisina ken maysa a covered court nga addaan ti entablado.
Asideg ti pagadalan iti Don Manuel Rivera Memorial Integrated National High School nga adda ti kurangna a 22 a classroom.
Inlawlawag ti Department of Education a ti posible a panagrenta kadagiti nakaserra a pribado a pagadalan ket mangkumpleto laeng ken saan nga agbalin a kasukat ti long-term infrastructure programs-da a gagem a masolbar ti 165,000-classroom backlog.
