LAOAG CITY – Inaprubaranen ti Economy and Development (ED) Council, nga idadaulwan ni President Ferdinand Marcos Jr., ti nailungalong a three-term school calendar ti Department of Education (DepEd) para iti School Year 2026–2027.
Basar iti Department of Economy, Planning, and Development (DEPDev), ti 201 school days ket magudwa iti tallo a termino no sadinno a ti umuna a term ket Hunyo–Setyembre; maikadwa a term:Setyembre–Disyembre ken ti maikatlo a term: Enero–Marso.
Iti kada term ket addaan ti 54–61 nga aldaw a panagisuro, karaman ti ababa a panaginana para iti non-academic activities ken enrichment programs.
Gagem ti trimester system a mausar a nasayaat ti oras ti panagadal a masansan ti pannakaitantan na gapu iti dakes a panawen, selebrasyon, wenno dadduma pay nga okasyon.
Inbatad ti Department of Economy, Planning, and Development a makatulong ti tallo a term structure iti at-atiddog a tuloy-tuloy a learning blocks, pannakapasayaat ti recovery ti estudyante, ken panangipaay ti panawen para iti professional development ti mangisursuro ken catch-up programs.
