LAOAG CITY – Inlawlawag ni Prof. Vladimir Ibañez, Department Chair ti Department of Computer Engineering iti College of Engineering iti Mariano Marcos State University iti siudad ti Batac nga awan ti kinapudnona ti maipagarup a saanda a pirmaan ti sertipiko dagiti 112 nga estudiante no saanda nga agbayad ti maysa a ribu a pisos.
Segun kenkuana, nagkiddaw ken nagsurat isuna kadagiti maseknan a nagannak dagiti estudiante ti naan-anay a tulong para iti pannakagatang ti air conditioner iti maysa a laboratorioda.
Inbatadna a masapolda daytoy gapu ta maasianda a makakita kadagiti agad-adal nga aglengleng-et kabayatan ti pannakaiyuswat ti klase dagitoy.
Kunana a nagkiddawda idi ti maysa nga air conditioner ngem saanna a kabaelan a palamiisen daytoy gapu iti kinalawa ti laboratorio.
Gapu iti daytoy, kuna ni Prof. Ibañez a napanunutanda nga agkiddaw ti maysa pay nga air conditioner iti napalabas a tawen ngem agpapan ita ket saan pay a napatgan.
Mainaig iti daytoy, inpalgakna a gapu iti gagemda a maaddaan ti air conditioner ti laboratorio ket naminsan a nangaramidda ti wagas babaen iti panangipatulodda ti surat kadagiti nagannak dagiti agad-adal.
Inpettengna a saan nga ingkapilitan ti panagbayad dagiti estudiante iti maysa a ribu a pisos no diket boluntario laeng.
Innayonna nga awan met ti maipataw a pannusa kadagiti agad-adal a saan nga agbayad iti nasao a gatad.
Naammoan a kadagupan kadagiti 112 nga estudiante ket 36 ti nagbayad ti maysa a ribu a pisos.
Kabayatanna, segun ken ni Dr. Prima Fe Franco, Officer In Charge ti Mariano Marcos State University nga awan ti naipadanon kenkuana maipanggep iti nasao a banag ngem inkiddawna kadagiti maseknan nga estudiante nga agsurat kenkuana para iti pannakasolbar iti daytoy nga isyu.
Immuna iti daytoy, adda ti naawat a reklamo ditoy Bombo Radyo Laoag a maipagarup a saan a mapirmaan ti sertipiko dagiti estudiante no saanda nga agbayad ti maysa a ribu a pisos.
