LAOAG CITY – Sangsangkamaysa a nagbotos dagiti senador pabor iti pannakaikkat iti pwesto ni Deputy President Rigathi Gachagua idiay Kenya.
Inaramid daytoy dagiti agpanpanday linteg kalpasan a napaay a napan nagatendar ni Gachagua iti impeachment trial gapu ta naitaray iti ospital.
Basar iti abogado ti deputy president, nagsakit ti barukong ti kliyente na isu gapuna a naitaray iti The Karen Hospital para iti naan-anay a pannakataming na.
Gapu iti daytoy, kiniddaw ti kampo ni Gachagua a maitantan ti impeachment trial ngem saan nga immanugot dagiti agpanpanday linteg.
Kabayatanna, inpetteng ni Gachagua a ti pannakaikkat na iti pwesto ket ibilang na kas “political lynching”.
Immunan a naakusaran ni Gachagua ti panagkunniber ken money laundering ngem napaneknekan a saan a guilty ti nasao nga opisyal.
Agpapan ita ket awan pay ti inparuk-at a komento ni Kenyan President William Ruto seknan iti pannakaikkat iti pwesto ti deputy president na.
