LAOAG CITY – Inpakaammo ni Sangguniang Panlungsod Member Atty. Jason Perera ditoy siudad ti Laoag nga adda ti inpasa ti konseho nga special permit para iti panagsubli ti derby ditoy siudad.
Kuna ni Perera a gapu ta awan ti sungbat ti Sangguniang Panlalawigan iti uneg ti 30 aldaw iti insubmitir da nga ordinansa maipanggep iti panagoperar ti pagpallotan ket dagus nga aprubado daytoy.
Mainaig iti daytoy, inpakaammo ni Perera a ti derby ket maiyuswat iti maminsan agingga iti mamindua iti kada lawas ngem agdepende nu mano ti entries.
Immunan nga inbatad ti konsehal nga ado ti maited ti panaglukat manen ti pallotan ditoy siudad.
Kuna na nga adda ti mapastrek babaen iti panagbayad ti special permit ti cockpit arena agraman dagiti trabahador, additional fees a kas iti upa, amusement tax ken dadduma pay a charges mainaig iti panagoperar daytoy.
