LAOAG CITY – Nagtalinaed ti takder ti aktor a ni Derek Ramsay nga awan ti pakainaigan na iti aniaman nga illegal nga aramid, kabayatan ti pannakaimbestigar ti kukua na a nabalor a lugan.
Nangrugi ti amin kalpasan a natiliw ti maysa a luxury car a naduktalan a kukua ti aktor usar ti illegal a plate number.
Nupay nakainaigan iti aktor ti nasao a behikulo, ti nangimaneho iti behikulo idi matiliw ket ti pagayam na a ni Anthony Jude “AJ” Violago.
Ni Violago ket presidente ken Chief Executive Officer ti San Lorenzo Ruiz Builders and Developers Group.
Inadmitir ni Violago a kukua na ti peke a plate number, ken dagiti letra iti daytoy ket isu ti initial ti nagan na.
Nagturong iti opisina ti Land Transportation Office da Derek ken AJ idi Agosto 17, 2026, kas sungbatda iti show cause order.
Nangisayangkat met ti imbestigasyon ti Bureau of Customs (BOC) gapu ta maipagarop nga addaan ti irregularidad ken kinakurang iti government compliance iti importation ti kotse.
Mainaig iti daytoy, inpetteng ni Derek a dimmalan iti umiso a proseso ti pananggatang na ti kotse, uppat a tawenen ti napalabas.
Innayon na a kompleto ti dokumento ti ginatang na a kotse ken nakasagana a makitinnulong iti Land Transportation Office.
