LAOAG CITY – Nakadependar ti desision ni Dr. Julius Manzano, Presidente ti Mariano Marcos State University ti agbalin a sungbat ni Dr. James Ventura III mainaig kadagiti reklamo kontra kenkuana.
Segun kenkuana, apaman a maawatna ti sungbat ti nasao a mangisursuro ket mangiyetnag daytoy ti pinal a desision kalpasan ti maysa a bulan.
Inbatadna a nangipila ni Ventura ti kaso administratibo idi Hulio 11.
Inlawlawagna a mabalin a mangipila ti kaso dagiti agrekreklamo iti Korte tapno direkta a masolbar daytoy.
Kunana nga adda ti posible a pannusa ti mangisursuro ngem saanda a mangiparuk-at ti pinal a desision agingga a saanda pay a naawat ti sungbat ni Ventura nga isu ti pangibasaranda iti daytoy.
Maipalagip a nangipatulod ni Manzano ti surat iti Commission on Higher Education – Region I no sadinno a ditoy a nakailanad a nakaawat ti unibersidad ti reklamo idi Hunio 11 ken maipaayan ti lima nga aldaw ni Ventura wenno agingga idi Hunio 19 tapno agsungbat iti reklamo kenkuana.
Naipalaon iti nasao a surat a mangiparuk-at ti desision ti Presidente ti Mariano Marcos State University maipanggep iti nasao a kaso agingga idi Hulio 11 ngem awan ti nagbalin a rakurak daytoy.
Immuna iti daytoy, adda ti naawat nga impormasion ti Bombo Radyo Laoag a maipagarup nga addan ti desision ti unibersidad nga isuspenso ni Ventura iti innem a bulan ngem agtultuloy a makaawat ti sueldo.
Rumrummuar a daytoy nga addang ket gapu iti maipagarup a panangprotehir ti administrasion ken ni Ventura nangruna ket maipagarup a naiget a pagayamna ti Legal Counsel ti unibersidad.
Kabayatanna, saan metten a nangipaay ti reaksion wenno komento ni Manzano maipanggep iti daytoy a banag.
