LAOAG CITY – Naituding nga iparuk-at ti Commission on Elections (Comelec) ti desisyon na mainaig iti 2025 Statement of Contributions and Expenditures (SOCE) ni Sen. Rodante Marcoleta intono Miyerkules, Marso 18 ita a tawen.
Segun ken mi Comelec Chairman George Erwin Garcia, nagbalin a nabara ti diskusyon iti nasao nga isyu iti en banc session ti komisyon.
Immuna iti daytoy, inbatad metten ni Garcia a sumangsango ti komisyon kadagiti ‘complications’ kabayatan ti panangsolbar da iti kaso a nakairamanan ni Marcoleta.
Daytoy ket kalpasan nga inrekomendar ti Office of the Ombudsman ti maysa a related complaint iti komisyon a mangkweskwestyunar iti Statement of Contributions and Expenditures ken uray iti Statement of Assests, Liabilities and Net Worth (SALN) ti senador.
Kabayatanna, basar iti Statement of Contributions and Expenditures ni Marcoleta, nakagastos ti senador ti P139.9 milyon para iti senatorial campaign na iti napalabas a tawen, a naglabes met iti linaon ti naideklarar nga Statement of Assests, Liabilities and Net Worth nga addaan ti P51.9-M.
Malaksid iti daytoy, inbatad met ti senador a saan a nakaawat ti aniaman a klase ti donasyon iti panagkampanya na.
