LAOAG CITY – Saan pay a pinal ti nagbalin a desisyon ti Political Finance and Affairs Department (PFAD) ti Commission on Elections a nangirekomendar ti pannakaibasura ti imbestigasyon mainaig iti maipagarop a panaglabsing ni Senador Chiz Escudero iti Omnibus Election Code gapu iti panagawat na ti P30-milyon a campaign donation manipod ken ni Lawrence Lubiano, presidente ti Centerways Construction and Development Inc.
Daytoy ti inbatad ti maysa a private lawyer a ni Atty. Kidd Castro.
Ti nasao a desisyon ket inaramid ti Political Finance and Affairs Department (PFAD) ti Commission on Elections gapu ta awan ti natibker nga ebidensya a mangipaneknek iti aniaman a panaglabsing ti senador.
Nupay kasta, kuna ni Atty. Castro a mabalin pay ti agpila ti motion for re-evaluation wenno iyapela dagiti petitioners iti Comelec en banc.
Innayon na a no saan latta a mapnek dagiti petitioners iti agbalin a resulta ket mabalin da nga iyuli iti Court of Appeals agingga iti Korte Suprema.
