LAOAG CITY – Maselyuanen ti April-22 decision ti International Criminal Court (ICC) ti kaso dagiti nainaganan kas co-perpetrator ni dati a Presidente Rodrigo Duterte.
Segun ken ni Atty. Neri Colmenares, ti maysa kadagiti agserserbi a legal counsel ti pamilya dagiti drug war victim, no ibasura ti international tribunal ti petisyon ti kampo ni Duterte a mangkweskwestyunar iti hurisdiksyon ti korte iti Pilipinas, selyuan metten ti korte ti kaso dagiti co-perpetrator a manamnama a possible a paarestar ti korte iti kabiitan a panawen.
Mamati ti kampo dagiti biktima a mangkweskwesyunar met dagiti co-perpetrator ti hurisdiksyon ti korte no mangiparuk-aten ti tribunal ti arrest warrant kontra kadakuada.
Inbatad ni Colmenares a napateg a kumpirmaren ti ICC ti hurisdiksyon na iti Pilipinas tapno mabalud metten dagiti co-perpetrator, kas ti immuna a pannakaibalud ti dati a presidente.
Kuna pay ni Colmenares a kalikagom dagiti biktima a makita ti amin a co-perpetrators a nakabalud ken sumangsango kadagiti panagdengngeg.
