LAOAG CITY – Kinumpirmaran ni Sang bayan member Stewart dela Cruz iti Marcos, Ilocos Norte a maiyimplementar intono bigat, Hulyo 18 ti nagbalin a desisyon ti Korte Suprema mainaig iti boudary dispute iti ili a Marcos ken ili a Nueva Era.
Inlawlawag na nga idi koma pay laeng Hulyo 11 a naipatungpal ngem adda ti nagbalin a pammilin iti higher office a saan pay laeng a matuloy.
Inbatad na a nailanad iti nagbalin a pammilin iti Korte Suprema nga awan ti makutkuti iti lote iti ili a Marcos malaksid laeng ti ¾ iti total land area iti dati a barangay Cacafean ti nasao nga ili.
Inpasingked ni dela Cruz a ti dati a barangay Cacafean ket awanen dagiti agnanaed.
Kabayatanna, maragsakan ni Vice Mayor Aldrin Garvida iti ili a Nueva Era gapu ta kalpasan ti nauday a panawen ket maipatungpalen ti desisyon ti Korte Suprema iti boundary dispute da iti ili a Marcos.
Linawlawagan pay ni Garvida a naitantan ti pannakaipatungpal ti desisyon ti Korte gapu ta kiniddaw ni Acting Mayor Roefel Pambid iti ili a Marcos maikkan da ti gundaway a mangilawlawag kadagiti umili.
