LAOAG CITY – Manamnama nga iparuk-at ti Sang. Panlalawigan ti desisyon na seknan iti kaso administratibo a sangsangwen ni San Nicolas Mayor Alfredo “Boying” Valdez, sakbay nga agngudo ti 60-day preventive suspension a naipataw kenkuana.
Segun kenni Atty. Davinci Crisistomo, chairman ti Committee on Laws, agpada a napintas ti agrumento ti partido ni Valdez ken dagiti complainant a da Engr. Ernesto Pagaring ken Damasco Tolentino.
Inbatad na nga agpannuray ti desisyon ti mayorya mainaig iti naipataw a preventive suspension kenni Valdez.
Maipalagip nga idi Oktubre 8 ket naiserbi ti preventive suspension kenni Valdez kalpasan a pinirmaan ni Gov. Matthew Marcos Manotoc ti rekomendasyon ti Sang. Panlalawigan.
Mainaig iti daytoy, kuna ni Manotoc a ti preventive suspension ket saan a mangipamatmat wenno indikasyon a guilty ti maysa a naelektaran nga opisyal no diket tapno saan a maimpluwensyaan dagiti testigo bayat a maim-imbestigar ti kaso.
