LAOAG CITY – Maiyur-uray ti pannakaileppas ti “dialysis center” iti Gov. Roque B. Ablan Sr. Memorial Hospital ditoy ciudad ti Laoag.
Segun ken ni Dr. Rogelio Balbag, director ti hospital management council ti gobierno probinsial, iti agdama ket agarup walo-pulo ket lima a porsienton ti nalpas iti nasao a pasdek.
Inbunannagna a nakasagana metten dagiti kasapulan a kagamitan para iti nasao a pasdek.
Mainaig iti daytoy, impalgakna a kalikagum ni Gob. Matthew Marcos Manotoc a sakbay a makumpleto ti pasdek ket makabiruken ti gobierno probinsial kadagiti personnel a mangiwanwan iti “dialysis center”.
Inlawlawag na a babaen iti daytoy ket makapag-operar a dagus ti dialysis center apaman a makumpleto ti pasdek.
Mangnamnama ni Balbag nga adda dagiti maala nga agserbi iti dialysis center iti kabiitan a panawen nangnangruna ket adu dagiti umili nga agkasapulan iti serbisio ti “dialysis center”.
Innayonna a saan nga agsareng ti gobierno probinsial babaen iti panangidaulo ni Gob. Marcos Manotoc a mangpasayaat iti serbisio ti salun-at kas iti mainayon manen a serbisio ti nasao a pasilidad ti Gov. Roque B. Ablan Sr. Memorial Hospital.
