LAOAG CITY – Manamnama nga adda ti maipasdek a “dialysis center” ditoy Ilocos Norte babaen iti maysa a kompania manipud India.
Inlawlawag ni Mr. Ravee Diksshit, Vice President ti International Operations ti Nephroplus, iti agdama ket adon dagiti naipasdek da a dialysis center iti nagduduma a paset ti pagilyan ken kalikagum da met nga adda ti maipatakder ditoy probinsia gapo ta ti chronic kidney disease ket maysa kadagiti lima a kangrunaan a pakatkatayan dagiti tattao ditoy pagilian.
Inpalgak na a basar iti datos manipud iti National Kidney Transplant Institute, maysa a Filipino ti maaw-awanan ti kidney iti kada oras a kaipapanan na ti duapulo ket uppat a tao iti inaldaw.
Segun kenkuana, interesado da a manglukat iti pribado a kompanya ken kalikagom da pay a makikammayet kadagiti Local Government Units para iti pannakaiyestablisar ti dialysis center.
Innayon na nga iti agdama ket plano dagitoy ti mangipasdek ti dialysis center iti siudad ti Laoag ken iti ili a Bangui.
Inapasingked na a maiyun-una dagiti nurses iti pagilian a maipaayan iti pagtrabahoan.
Innayon na a mangididiaya pay dagitoy ti training academies a mangipaay ti “training” kadagiti registered nurses ken dagitoy payen ti mangipaay ti pagtrabahoan da a saanen a kasapulan a pumanaw da iti pagilian.
