LAOAG CITY – Inpetteng ni Senador Sherwin Gatchalian a masapol nga agseryoso ti Department of Information and Communications Technology (DICT) a mangadal iti information breach iti Philippine Charity Sweepstake Office (PCSO) a sinerrek dagiti hackers.
Iti statement, inbatad ni Gatchalian nga uray dinismis ti Philippine Charity Sweepstake Office ti report kas fake news, saan a rumbeng nga agkampante ti Department of Information and Communications Technology iti isyu.
Kuna pay ni Gatchalian a masapol a makitinnulong iti amin nga ahensya ti gobierno ti Department of Information and Communications Technology ken National Privacy Commission (NPC) tapno mangisyuswat ti regular security audits, naiget a panangipatungpal ti data protection protocols, ken papigsaen ti cybersecurity training iti personnel da.
Immunan a naglikudan ni Philippine Charity Sweepstake Office General Manager Mel Robles ti report a nakompromiso ti nagan ti nangabak iti lotto a nangipaay ti panagdudua iti integridad ti paay-ayam ti ahensya.
Naduktalan daytoy kalpasan nga inadmitir iti Facebook post ti Philippines Exodus Security, maysa a grupo ti hacker a naserrek iti website ti Philippine Charity Sweepstake Office ken tinakaw da ti datos ti ahensya karaman dagiti emails ken profile ti lotto winners.
Innayon ni Robles nga awan ti rumbeng nga ipakaammo da iti Department of Information and Communications Technology gapu ta awan ti napasamak.
