LAOAG CITY – Agtultuloy ti iyus-uswat a monitoring Department of Information and Communications Technology iti baro a wagas ti agraira a panagwaras ti saan nga usto nga impormasyon ita a mapaspasangasangan ti eleksyon.
Nadiskubre ti nasao a departamento dagiti Advance Persistent Threat Groups nga adda ti us-usaren na a taktika a maaw-awagan ti ‘Amplifiers’.
Inlawlawag a mismo ni Undersecretary Jeffrey Dy ti Department of Information and Communications Technology nga imbes nga hacking, ti maipagarop a panag-amplify dagiti kontrobersyal nga online video contents ti sentro dagiti hacker iti agdama.
Segun kenkuana, adda pay ti us-usaren nga analytics dagitoy tapno maestablisar no ania a video ti us-usaren da iti panagiwaras iti saan nga umiso nga impormasyon a gagem na a perdien ti maysa a kandidato.
Innayon na a dagiti Advance Persistent Threat Groups ket saan nga ordinaryo a grupo a pasimuno ti babassit nga hacking no di ket ti pangta dagitoy ket possible a makaapektar iti intero a pagilian.
Gapu iti daytoy, nagballaag ni Dy iti publiko a saan a dagus nga i-click wenno ag-react kadagiti makitkita a post online gapu ta sumagmamano kadagitoy ket inranta da nga iwaras iti nagduduma a platforms tapno maala ti atensiyon ti maysa nga indibwal.
