LAOAG CITY – Inpakaammo ti Department of Information and Communications Technology (DICT) a nangbukel ti special task group para iti al-alisto a pannakasolbar ti phishing incidents ken dadduma a cyberscams.
Segun ti ahensya, adda ti pannakaitaripnong da iti Cybercrime Investigation and Coordinating Center (CICC), dagiti tallo a major telecommunication firms, banks, e-wallet companies, National Telecommunications Commission (NTC) ken ti National Privacy Commission (NPC) para iti pannakatratar ti cyber threats ken cyber scams.
Kuna ni Department of Information and Communications Technology Secretary Ivan John Uy a napagnunumoan a mabukel ti special task group ken agpokus iti pannakasolbar ti lumawlawa a pangta iti cyberspace.
Inbatad na a ti kalikagum da manipod iti maysa a potential phishing wenno cyber scam ket maaksyunan a dagus iti uneg ti 24 nga oras tapno masigurao a saan nga agwaras.
Segun ti opisya, ti special task force ket agkikita pay iti sumaruno a lawas para iti pannakatratar ti procedures ken guidelines manipod iti reporting cyber scams agingga iti preventive measures iti daytoy.
Kabayatanna, malaksid iti pannakapapigsa ti local efforts, kuna ni Uy nga adda pay ti pannakakioordenar da iti international organizations kas iti United Nations Drug Office, International Telecommunications Union ken ti International Criminal Police Organization tapno ad-adda a mapugas ti cybercrime.
