LAOAG CITY – Naituding nga agtataripnong ti Department of Information and Communications Technology (DICT), National Telecommunications Commission (NTC) ken dagiti Telecommunications Company tapno pagsasaritaan ti umadanin panagleppas ti panagirehistro kadagiti Subscriber Identity Module (SIM) card intono Abril 26 ita a tawen.
Daytoy ti inbatad ni Atty. Anna Minelle Maninding, ti legal officer ti National Telecommunications Commission – Region I.
Segun ken ni Maninding, ti kangrunaan a matratar iti maiyuswat a taripnong ket ti possible a pannakaiyalud-od ti Subscriber Identity Module (SIM) card registration.
Kuna na a matingiting a naimbag no rumbeng a maiyalud-od ti panagirehistro iti Subscriber Identity Module (SIM) card iti pagilyan.
Inpakaammo na a no mapagnununoam dagiti maseknan a maiyalud-od pay ti Subscriber Identity Module (SIM) card registration ket maipaay ti nayun a 120 nga aldaw tapno mairehistro aminen dagiti Subscriber Identity Module (SIM) card.
Nupay kasta, inpalagip na a no agdesisyon ti Department of Information and Communications Technology a saanen a maiyalud-od pay ti Subscriber Identity Module (SIM) card registration ket otomatiko a madeactivate dagiti cellphone numbers a saan a nairehistro kalpasan ti deadline intono Abril 26 ita a tawen.
Iti agdama, inpakaammo ni Maninding a basar iti datos da agingga idi Abril 22 ita a tawen ket adda laeng ti 18,372, 656 weno 47.84% ti nakarehistro a Subscriber Identity Module (SIM) card.
Mainaig iti daytoy, inpetteng ni Maninding a dagiti nagatang a Subscriber Identity Module (SIM) card sipud idi Disyembre 27, 2022 ket otomatiko a madeactivate kalpasan ti deadline no saan a maiyalud-od, ngem dagiti magatang a baro a Subscriber Identity Module (SIM) card ket mabalin nga irehisto uray nalpasen ti deadline.
