LAOAG CITY – Maysa a lalaki idiay Dammam, Saudi Arabia ti binigbig ti Guinness World Records gapu ta addaan daytoy ti kadakkelan a koleksion ti memorabilia manipud iti sikat a comic book ken TV series a The Walking Dead.
Kalpasan a dimmanon iti 3,053 a pedaso ti The Walking Dead memorabilias ni Rashid Al-Olayan, inaramidna a mini-museum ti maysa a paset ti pagtaenganda tapno ipakita ti koleksion.
Karaman ditoy dagiti costume nga inusar mismo iti produksion ti TV series. Basar kadagiti report, rinugianna ti koleksion idi 2015 babaen iti maysa a set ti action figures.
Nagbalin a fan ni Al-Olayan ti The Walking Dead gapu kadagiti relatable a karakter daytoy. Maysa kadagiti rason no apay a nagbalin a paboritona daytoy ket gapu kadagiti unexpected twist and turns ti estoria.
Naammoan a dagiti sumagmamano a memorabilia iti koleksionna ket ti pirma dagiti aktor manipud iti TV series.
