LAOAG CITY – Inlawlawag ni Doctor Alan Taylan a saan a rumbeng nga ilaok kadagiti agas dagiti kemikal a diethylene glycol and ethylene glycol.
Inbatad na nga imbes a dagiti nadakamat a kemikal ti usaren ken agaramat laengen ti Glycerin.
Segun ken ni Doctor Taylan, ti diethylene glycol and ethylene glycol ket narisgo para iti salun-at ti maysa a tao gapu ta daytoy ket makasabidong ken mangitunda iti ipapatay kangrunaan na dagiti ubbing.
Inpakaammo na a karaman kadagiti sintomas no makaipauneg kadagiti nadakamat a kemikal ket ti panagbakwar, agsakit ti buksit na, agsakit ti ulo ken ti kakaroan ket ti panagpasar ti severe kidney no sadinno a no agbalinen nga Acute Renal Failure ket saanen a makaisbo ti ubing ken ramanen na ti nagduduma a paset ti bagi na.
Inadmitir ni Doctor Taylan a narigat a madeterminar no ti maysa nga agas ket addaan ti kemikal a diethylene glycol and ethylene glycol gapu ta possible a saan a maikabil dagitoy iti label na.
Innayon na a no makapasar kadagiti nasao a sintomas ket masapol a mapan agpacheckup a dagus ken dumalan kadagiti nagduduma nga eksaminasyon kas ti pannakaeksamen ti dara ken dadduma pay.
Immun-una iti daytoy, adda ti agarop 66 nga ubbing a pimmusya idiay Gambia gapu iti panagtumar da ti cough syrups a maipagarop a nalaukan ti diethylene glycol and ethylene glycol.
Inpalagip pay ni Doctor Taylan nga adda man ti kastoy a napasamaken idiay Panama idi 2007 a nakatayan ti agarop 365 nga ubbing.
