LAOAG CITY – Nagballaag ti Department of the Interior and Local Government (DILG) kadagiti opisial ti Bureau of Fire Protection (BFP) nga adda pakainiganna iti maipagarup “slot for sale” modus, iti baet ti nationwide recruitment para iti sumurok dua a ribo a bakante a posision iti ahensia.
Ti panagballaag ti Department of the Interior and Local Government (DILG) ket kalpasan ti maysa a kaso no sadinno ket maysa kadagiti kameng ti Bureau of Fire Protection (BFP) nga addaan ti ranggo a Senior Fire Officer 1 ti mapagarup aglaklako ti slot kadagiti aplikante kasukat ti P300,000.
Kabayatanna, addan iti kustodiar ti Criminal Investigation and Detection Group (CIDG) ken manarimaan a nakabalud ti suspek a sumangsango iti kaso a robbery extortion.
Segun ken ni Interior Secretary Jonvic Remulla, seryoso ti kampaniada a dalusan ti ahensia kontra kadagiti anomalia ken korapsion ken siguradoenna nga agsungbat ti siasinnoman mapanekekan a naglabsing kadagitoy.
Innayon pay ni Remulla a manarimaanen nga imimbestigaran ti Department of the Interior and Local Government (DILG) dagiti sumurok 200 nga opisial, pakairamanan pay dagiti sumagmamano a regional directors a maipagarup adda pakainaiganna iti nasao a modus nga umabot iti 100,000 agingga 800,000 a pisos a panagsingir iti kada transaksion.
Gapu iti daytoy, ilunglungalong ti ahensia ti e-hiring recruitment system a kalikagumna a siguraduen nga awan ti aniaman nga anomalia ken human intervention kadagiti umuna a paset ti hiring process dagiti agkalikagum a sumrek iti Bureau of Fire Protection (BFP).
Malaksid iti daytoy, kalikagum pay ti baro a sistema a paalistuen ti proseso para kadagiti aplikante ken tapno makatulong kadakuada a makissayan ti gastosda iti panag-apply-da.
