LAOAG CITY – Tutukan ti Department of the Interior and Local Government ditoy siudad ti Laoag iti panakaitandudo ti good governance.
Segun ken ni Ms. Charis Garma, mangidadaulo ti Department of the Interior and Local Government ditoy siudad, daytoy ket kas maiyataday met laeng iti gagem ti opisinada.
Inbatadna a kalikagumna a matulungan dagiti barangay officials ditoy siudad nangruna ket adu dagiti baro a naelektaran.
Inlawlawagna a mangisayangkatda ti specialized training para kadagiti barangay officials maipanggep iti barangay legislation pakairamanan ti katarungang pang-barangay a pakabenepisiaran dagiti Lupon Tagapamaya.
Kunana a napateg dagitoy a banag gapu ta kas maysa nga opisial ti gobierno ket rumbeng nga ammoda ti ar-aramidenda nangruna ti panagaramid ti ordinansa ken resolusion.
Maipalagip nga immunan nga inrakurak ti Sangguniang Panlungsod ditoy siudad ti Laoag a kasapulan dagiti sumagmamano nga opisial ti barangay ditoy siudad ti seminar kalpasan nga adu dagiti ordinansa ken resolusion nga in-validate ti konseho kalpasan nga adda dagiti nakaipalaon a saan a maiyannatop iti paglintegan ti pagilian.
