LAOAG CITY – Nangipatulod ti Department of the Interior and Local Government – Ilocos Norte ti surat iti Local Government Unit iti ili ti Vintar tapno ilawlawagda ti maipanggep iti naladaw a pannakaipasa ti Annual Budget.
Segun ken ni Mr. Gerald Gallardo, Provincial Director ti DILG ditoy probinsia, basar iti panakisarsaritana kada Mayor Richard Degala, Vice Mayor Dr. Maribel Albano ken ni SK Federated Pres. Dan-Dan Mabanag, Chairman ti Committee on Finance ken Appropriations ket ditoy nga adda dagiti kasapulan nga adjustments ti Annual Investment Plan ken Local Development Plan nga inrekomendar ti Sangguniang Bayan babaen iti Committee on Finance and Appropriations kas maibasar iti pannakatingiting iti pundoda nga isu ti masapol nga ikonsiderar ti Municipal Development Council ken Executive Department.
Inbatadna a ti kinapudnona ket sakbay pay ti Oktubre 16, 2022 ket naiplastaren ti Annual Budget ti LGU Vintar ngem kabayatan ti pannakatratarna iti Sangguniang Bayan ket adda dagiti sumagmamano a kasapulan pay a mailawlawag kas ti Program of Works, Procurement Plan ken dadduma pay banag a saan a nailanad iti nailungalong a pundo.
Inlawlawagna a gapu ta saan a naabutan ti pannakaipasa ti Annual Budget iti ili ti Vintar ket agbalin daytoy a reenacted no sadino no ania ti plastar ti Annual Budget idi tawen 2022 ket isu met ti masurot ita a tawen 2023.
Kunana kas maibasar iti Local Government Code ket mabalin pay a maikamakam ti pannakaipasa ti Annual Budget iti nasao nga ili agingga inton Marso 31.
Inbagana a mabalin met a mangiyuswat dagiti agpanpanday linteg ti Special Session tapno saanen nga iyuray pay ti Regular Session tapno matratar ti proposed annual budget ti LGU Vintar.
Innayonna nga iti ili ti Vintar laengen ti kakaisuna a Local Government Unit ti saan pay a nakaipasa ti Annual Budget para ita a tawen 2023.
