LAOAG CITY – Posible a saan a palubusan ti kiddaw a “work from Hague” para ken ni dati a Presidente Rodrigo Duterte.
Daytoy ti inbatad ni Interior Sec. Jonvic Remulla kalpasan ti panangabak ti dati a Presidente iti mayoralty race idiay Davao City.
Inlawlawag ni Remulla nga ipakaammona iti International Criminal Court no mabalin nga ipatulod ti Pilipinas ti maysa a konsul tapno agsapata ni dati a Presidente Duterte kas Mayor ti Davao City.
Iti baet ti pannakaibaludna iti International Criminal Court gapu kadagiti alegasion ti crime against humanity, ni Duterte ket opisial nga indeklarar kas Mayor ti Davao City.
Nangabak ni Duterte nga addaan ti sumurok 662 a ribu a butos kontra iti kinabinnalubalna a ni Karlo Nograles a nakagun-od laeng ti 80 a ribu a butos.
Kabayatanna, gapu iti pannakaibaludna, ti anakna a ni Davao Vice Mayor Sebastian Duterte ti agserbi kas Acting Mayor iti panawen nga awan isuna.
